Poinsettia (*para sa isang kaibigan)

Mga dahong animo’y bulaklak

binubuo ng mga talulot

na nakaayos

tulad ng sa parol,

nababalot ng tininang papel

‘sing pula ng mansanas.

 

Sa liwanag kaya mong mabuhay

sa dilim lalo kang tumitibay –

tingkad ng kulay

lumalabas na tunay,

ito’y iyong naipasisilay

tila walang humpay.

 

Sinong mag-aakalang

hindi magtatagal,

matatanggal

at tuluyang maglalaho

ang pula

sa iyong mga dahon.

 

Nawalan ka ng bahagi

na sa iyo’y katangi-tangi,

ngunit kumupas man ang rikit,

mananatili kang pambihira,

pagkat patuloy kang nakatindig,

nakakapit sa lupa.